Kosningaaldur miði við fæðingarár en ekki fæðingardag

Ungt Framsóknarfólk sendi á dögunum inn umsögn vegna frumvarps til kosningalaga. Þar lögðum við sérstaka áherslu á að kosningaaldur verði miðaður við fæðingarár en ekki fæðingardag líkt og gert er í Noregi. Ungt Framsóknarfólk fagnaði jafnframt ákvæði um póstkosningu, en við teljum það auka aðgengi að einum mikilvægasta rétti í lýðræðisríki, kosningarétti.

Gunnar Ásgrímsson, ritari ungs Framsóknarfólks og Magnea Gná Jóhannsdóttir, kynningarstjóri ungs Framsóknarfólks fóru á fund með Stjórnskipunar- og eftlitsnefnd Alþingis á dögunum f.h. ungs Framóknarfólks og greindu frá umsögninni. Vel var tekið í tillögurnar og verður því spennandi að fylgjast með framgangi málsins í þinginu.

Umsögnina má lesa í heild sinni hér fyrir neðan.

Umsögn Sambands ungra Framsóknarmanna vegna frumvarps til kosningalaga

Kosningaldur:

Ungt Framsóknarfólk leggur til að kosningaréttur verði veittur við byrjun þess árs sem einstaklingur nær kosningaaldri, en ekki við fæðingardag.

Ungt Framsóknarfólk telur það ekki lýðræðislegt að neita ungu fólki um kosningarétt einungis vegna þess að þau fæðast seinna á kosningaárinu. Þau sem fæðast á sama ári eru talin jafningjar í augum samfélagsins, þau fylgjast að í gegnum grunnskóla, taka lokapróf saman og útskrifast saman. Allt óháð því hvort þau fæðist í janúar, júní eða desember.

Þrátt fyrir það að vera talin jafningjar eru þau ekki jöfn þegar kemur að rétti til kosninga, mikilvægasta rétti sem fyrirfinnst í lýðræðisríki.

Í þessu samhengi er vert að benda á að Norðmenn miða kosningarétt við fæðingarár en ekki fæðingardag. Sem dæmi stendur eftirfarandi í 50. gr. norsku stjórnarskrárinnar:

„Kosningarétt hafa allir norskir ríkisborgarar, karlar og konur, sem orðnir eru eða verða fullra átján ára á því ári sem kosningar eru haldnar.“

Norðmenn hafa því sýnt gott fordæmi í þessum efnum og ættum við að taka þá okkur til fyrirmyndar og jafna þannig rétt ungs fólks til þátttöku í kosningum.

Ungt Framsóknarfólk leggur því til að viðeigandi greinum frumvarpsins verði breytt, svo að kosningaréttur verði miðaður við fæðingarár í stað fæðingardags.

Póstkosning:

Ungt Framsóknarfólk fagnar því að í frumvarpi til kosningalaga er í 71. gr. ákvæði um póstkosningu. Póstkosning er mikið framfaraskref sem eykur aðgang fólks að mikilvægasta rétti lýðræðisríkis, kosningarétti. Dæmi eru um að Íslendingar erlendis hafi þurft að ferðast langar leiðir á kjörstað búi þeir eða hafi aðsetur langt frá utankjörfundar kjörstað erlendis. Heimsfaraldurinn sem nú gengur yfir hefur þá jafnframt sýnt fram á að ferðafrelsi fólks getur verið takmarkað á svipsstundu og því enn fremur ástæða til þess að auka aðgengi fólks til þess að nýta kosningarétt sinn.