Karítas Ríkharðsdóttir
NA kjördæmi
|
Framboð.
Ég býð mig fram fyrir brothættar byggðir, sem betur væru kenndar við viðnámsþrótt. Svo hagsmunir heildar verði tryggðir, af krefjandi verkefnum er ofgnótt. Byggðamálin ber að nálgast, af festu og svo ekki stefni í tjón, Af einlægni, ástríðu og farsælast; af samvinnuhugsjón. Ég býð mig fram í 3.- 4. sæti á lista Framsóknar í Norðausturkjördæmi fyrir næstu Alþingiskosningar og lofa því að ég er betri í stjórnmálastarfi en kveðskap. Framundan eru mörg krefjandi verkefni á heims-, lands- og landshlutavísu og skýr stefna sjaldan verið mikilvægari. Rödd ungs fólks þarf að heyrast og framboð flokksins að endurspegla kraftinn í ungu Framsóknarfólki. Ég bý að nokkurra ára reynslu af starfi í Framsóknarflokknum þ.á.m. í stjórn SUF og félagi ungra á Akureyri og nágrenni. Ég starfa sem blaðamaður hjá Morgunblaðinu og í úrræði fyrir heimilislausar konur. Ég starfaði í 2 ár fyrir þingflokk Framsóknarflokksins og þekki því starfið á Alþingi vel. Ég er fædd og uppalin á Raufarhöfn og kýs að vera þar með annan fótinn, þegar störf mín leyfa. Ég sótti bæði mennta- og háskóla á Akureyri, bjó þar í sjö ár og er sjávarútvegsfræðingur. Mín síðasta námsáskorun var að þreyta smáskipapróf í Stýrimannaskólanum. Alla tíð hef ég verið virk í félagsstarfi og brunnið fyrir mitt samfélag. Í leik og starfi hef ég fengið að kynnast mörgum stöðum í kjördæminu og sé sóknarfæri í hverju horni. Tryggja þarf öllum samfélögum jöfn tækifæri til að nýta sína möguleika. Ég get lagt þeirri vinnu lið. Ég hvet alla sem vilja styðja mig í verkefninu framundan til að skrá sig í Framsókn fyrir miðnætti föstudaginn 29. janúar hér: framsokn.is/ganga-i-flokkin/ og hafa samband í síma 7784312. Kæru félagar, brettum upp ermar! Áfram veginn. |