Þingflokkur fær afhentar ályktanir

Unnur Þöll, formaður Sambands Ungrar Framsóknar, afhenti Þingflokki Framsóknar ályktanir frá Sambandsþinginu okkar í október. Ingibjörg Isaksen, þingflokksformaður, tók formlega á móti skjalinu á fundi þingflokksins í gær.
 
Formaður SUF fær að sitja alla þingflokksfundi Framsóknar sem áheyrnarfulltrúi og sækir hún slíka fundi tvisvar í viku. Að auki fór Unnur yfir dagskrá SUF fyrir árið 2022. Þá munum við halda áfram með Skuggaráðuneytin, sem er vettvangur fyrir ungt fólk í Framsókn að hitta ráðherra og þingmenn Framsóknarflokksins og kynnast störfum þeirra ásamt því að spyrja spurninga og koma sínum sjónarmiðum, sem og skoðunum, á framfæri.

​Ályktanir frá  46. Sambandsþingi 2021

1.
Ungt Framsóknarfólk vill að farið verði í markvissari og hraðari aðgerðir til að flýta fyrir innviðauppbyggingu til að styðja við orkuskipti í samgöngum. Nauðsynlegt er að horfa þar til fjölþættra lausna t.d. rafmagns, vetnis, metan. Tryggja þarf bundið slitlag til þess að styðja við þessa þróun.

​2.
Ungt Framsóknarfólk vill að öll aldurstengd réttindi fullorðinna verði endurskoðuð eftir 18 ára aldur með það í huga að afnema aldurstakmarkanir. 

3.
Ungt Framsóknarfólk vill að innflutt matvæli lúti að lágmarki sömu gæðakröfum og á Íslandi þegar kemur að framleiðslu matvæla t.d. aðbúnaði dýra. Þannig sé best hægt að tryggja gæði varanna og sanngjarna samkeppni við innlenda matvælaframleiðslu.

4.
Ungt Framsóknarfólk vill að tíðarvörur verði aðgengilegar í skólastofnunum landsins endurgjaldslaust og að skattur verði afnuminn af tíðarvörum.

5.
Ungt Framsóknarfólk vill hvetja nýja stjórn SUF til þess að notast frekar við styttinguna Ung Framsókn í daglegu tali, frekar en skammstöfunina SUF, fram að næsta sambandsþingi. 

6.
Ungt Framsóknarfólk vill að unnið verði áfram að lágu vaxtastigi í landinu. Þetta sé m.a. til þess að gera ungu fólki kleyft að eignast eigin fasteign. 

7.
Ungt framsóknarfólk harmar hversu erfitt það reynist ungu fólki að verða sér um eigin fasteign. Á síðasta kjörtímabili voru stór skref tekin í átt að gera ungu fólki auðveldara með að kaupa sína fyrstu fasteign, t.d. með tilkomu hlutdeildarlána, þar sem Framsókn var í fararbroddi vinnunnar. Þó felst vandinn aðallega í lóðaskorti, sem hefur verið viðloðandi í þéttbyggðum landsins síðastliðin ár. Umræddur lóðaskortur veldur þenslu á fasteignamarkaði og leiðir til hækkandi íbúðaverðs, sem leiðir einnig til hækkandi leiguverðs í þokkabót. Á þessu ári hefur verðbólga aukist og stýrivextir hækkað vegna talsverðrar verðhækkunar.
Ungt framsóknarfólk telur að auka verði framboð á lóðum til byggingar heimila. Með því að auka framboð er hægt að mæta síhækkandi eftirspurn og þannig lækka bæði íbúðaverð og leiguverð. Það myndi auðvelda ungu fólki að flytja úr foreldrahúsum og öðlast sjálfstæði fyrr á lífsleiðinni.
Til þess að ná ofangreindu markmiði er nauðsynlegt að stjórnvöld endurskoði reglur varðandi skipulag og framkvæmdir. Sveitarfélög taka óralangan tíma að samþykkja skipulag nýrra hverfa og tryggja framboð nýrra lóða vegna núgildandi reglna og viðmiða. Einnig leiðir sífellt flóknara regluverk og eftirlitskerfi til aukins byggingarverðs og gerir það að verkum að framkvæmdir taka lengri tíma. Stjórnvöld verða að endurskoða kerfið með þessi sjónarmið að leiðarljósi og tryggja aukið lóðaframboð þvert yfir landið.

8.
Ungt Framsóknarfólk krefst þess að farið verður í grænar fjárfestingar m.a. til að hraða orkuskiptum og mæta skuldbindingum okkar í Parísarsamkomulaginu. Mikilvægt er að þær verði ofarlega á borðinu í stjórnarsáttmála nýrrar ríkisstjórnar.