19 / 04 / 2009 | Eggert Sólberg Jónsson Framhaldsskólanemar ættu að kjósa Framsókn í vor
Í vikunni sem leið spurði framhaldsskólanemi mig af hverju hann
ætti að kjósa Framsóknarflokkinn. Einfaldri spurningu fylgir langt svar þar sem
framhaldsskólanemar eru fjölmennur og margbreytilegur hópur.
18-20 ára einstaklingar eru stærsti hluti þeirra sem hafa
kosningarétt í framhaldsskólunum. Sá hópur er að stíga sín fyrstu skref með
nýfengin réttindi s.s. lögræði, þ.e. sjálfræði og fjárræði auk annarra réttinda
t.d. bílprófs. Kosningastefnuskrá framsóknarmanna í ár snýst í stórum dráttum
um fjóra megin málaflokka, þ.e. efnahags-, atvinnu-, lýðræðis- og velferðar- og
menntamál.
Menntun og velferð – fyrir okkur öll
Fyrir framhaldsskólanema skiptir menntakerfið e.t.v. mestu
máli. Framsóknarmenn hafa ávallt talað fyrir jafnrétti til þátttöku á öllum
sviðum samfélagsins. Um það er flokkurinn stofnaður og munum við aldrei víkja
frá þeirri stefnu. Allir eiga að geta sótt sér menntun óháð efnahag og búsetu.
Skólagjöld við opinbera framhalds- og háskóla koma því ekki til greina. Við
viljum tryggja að á næstu árum verði staðinn vörður um framhaldsskólakerfið sem
við höfum byggt upp á síðustu árum.
Ungt framsóknarfólk hefur bent á að aðgengi að
getnaðarvörnum hefur versnað á síðustu mánuðum. Kynheilbrigðismál eru ungu
fólki mjög mikilvægur málaflokkur. Það skiptir miklu máli að aðgengi að
getnaðarvörnum sé gott til þess að koma í veg fyrir kynsjúkdómasmit og
ótímabærar þunganir. Verð spilar þar stóran part. Á sama tíma og verð á smokkum
hefur hækkað um 45% hefur salan á þeim dregist saman um 25% samkvæmt tölum sem
birtust í fréttum undir lok síðasta árs. Samtöl okkar við innflytjendur
staðfesta þessa þróun sem er þvert á það sem er að eiga sér stað í
nágrannalöndum okkar.
Lækkun á virðisaukaskatti á getnaðarvörnum er leið til þess
að draga úr útgjöldum til heilbrigðismála. Komi til þess að ótímabærum þungunum
fjölgi og kynsjúkdómasmitum einnig sem veruleg hætta er á mun það leiða til mun
meiri kostnaðar á heilbrigðiskerfinu. Hér er því um þjóðhagslega arðsama aðgerð
að ræða.
Atvinna – fyrir okkur öll
Nú veit ég ekki hvort framhaldsskólaneminn sem spurði mig
spurningarinnar sem ég nefndi í upphafi sé kominn með vinnu í sumar en
útlit er fyrir að allt að 70% framhaldsskólanema fái ekki vinnu í sumar. Það er
óásættanlegt og hafa framsóknarmenn rætt um að koma á fót sumarskólum,
sumarönnum og að ráðast í átaksverkefni til þess að stúdentum bjóðist vinna.
Við þurfum að koma hjólum atvinnulífsins aftur af stað og hafa framsóknarmenn kynnt
ítarlegar efnahagstillögur með það að markmiði. Það þarf nefnilega að skapa
verðmæti til þess að hægt sé að halda úti mennta-, heilbrigðis- og félagslega
kerfinu, byggja vegi, tryggja öruggar samgöngur o.s.frv.
Réttlæti – fyrir okkur öll Í réttlætis og lýðræðismálum þá hafa framsóknarmenn barist
fyrir því að samin verði ný stjórnarskrá. Við viljum ekki að þingmenn geri það
heldur á þjóðin sjálf að velja sér sína fulltrúa til þess á stjórnlagaþing.
Annað réttlætismál fyrir 18-20 ára einstaklinga er að fá að versla sér áfengi.
18 ára einstakling er treystandi til þess að bera ábyrgð á lífi sínu og annarra
í umferðinni, hann má taka lán og gifta sig. Þar sem hann er með kosningarétt
hefur hann allan rétt til þess að ákveða hvort opna eigi áfengisútsölu í
viðkomandi sveitarfélagi ef kosning um slíkt færi fram. honum er bara ekki
treyst til þess að versla með áfengi.
Að lokum get ég bætt því við að forysta Framsóknarflokksins
er sú yngsta í íslenskum stjórnmálaflokki. Formaður flokksins er aðeins 34 ára
gamall og varaformaðurinn 29 ára. Þá er meðalaldur þingflokksins sá lægsti á
þingi. Framsóknarmenn hafa alltaf tekið tillit til ungs fólks og hlustað á
skoðanir þeirra. Ungt fólk hefur því áhrif innan flokksins.
Hér tel ég upp nokkrar ástæður fyrir því af hverju framhaldsskólar ættu að kjósa Framsóknarflokkinn. Þeir sem hafa spurningar um efnið
sem hér kemur fram eða annað sem við kemur kosningunum geta ávalt leitað á
kosningaskrifstofur flokksins um allt land. Þar er tekið vel tekið á móti
öllum.
Eggert Sólberg Jónsson
varaformaður Sambands ungra framsóknarmanna
