 |
19 / 01 / 2009 | Eggert Sólberg Jónsson
Lifi byltingin!
Okkur tókst það og ungt fólk í framsóknarflokknum brosir út að eyrum. Á
leið út úr Valsheimilinu á Hlíðarenda seint í gærkvöldi þegar búið var
að ganga frá eftir 30. flokksþing framsóknarmanna sagði einn SUF-ari
við mig: „Við þurfum að gera þetta oftar“. „Hvað þá?“ spurði ég á móti.
„Að bylta stjórnmálaflokkum“ segir þá SUF-arinn. Það var ekki fyrr en
þá sem ég áttaði mig á því hvað í raun og veru hafði gerst um helgina.
Ungt fólk sem krafðist breytinga hafði gert byltingu í þessum elsta
stjórnmálaflokki landsins.
„Það eru óvenjulegir tímar og fólk virðist tilbúið til óvenjulegra
hluta“ sagði nýr formaður flokksins þegar hann gaf kost á sér. Hann
hafði rétt fyrir sér. Meðalaldur nýrrar forystusveitar flokksins er
aðeins 33 ár og verður það að teljast óvenjulegt í íslenskum
stjórnmálum. Sigmundur Davíð Gunnlaugsson, formaður er aðeins 33 ára
SUF-ari. Hann er yngsti formaður flokksins frá upphafi. Birkir Jón
Jónsson, varaformaður er 29 ára SUF-ari. Eygló Harðardóttir, ritari er
36 ára og nýskriðin af SUF-aldri.
Þegar við sem nú erum í forsvari fyrir SUF ákváðum að gefa kost á okkur
til þeirra starfa var það fyrst og fremst vegna þess að við sáum að
breytinga var þörf á flokknum. Við vorum komin með nóg af hinum og
þessum vinnubrögðum sem viðgengist höfðu meðal allra stjórnmálaflokka á
Íslandi. Við heyrðum kall grasrótarinnar eftir breytingum, kalli sem
ekki hafði verið hlustað á. Við sáum að byltingar var þörf.
Mikill meirihluti þeirra flokksmanna sem við heyrðum í var okkar
framtíðarsýn sammála þó vissulega hafi ekki allir jafn sáttir við þá
gagnrýni sem við héldum uppi eins og frægt er. Sumir létu okkur fá það
óþvegið, réðust að mannorði okkar og kölluðu okkur illum nöfnum. Við
höfum hins vegar breitt bak og héldum ótrauð áfram enda vissum við að
það yrði að ráðast í sársaukafullar aðgerðir. Það skyldi hins vegar
ekkert stoppa okkur í því að koma Framsóknarflokknum aftur á þann stall
sem flokkurinn á að vera á í íslenskum stjórnmálum. Hafi einhver efast
um að SUF væri á réttri braut þá hlýtur sá hinn sami að hafa skipt um
skoðun um helgina.
Við kröfðumst breytinga á forystu flokksins. Við kröfðumst líka
breytinga á vinnubrögðum innan flokksins og var stigið stórt skref á
þinginu í þeim efnum. Þannig er kjördæmissamböndum nú heimilt að opna
kjördæmisþing sín öllum félagsmönnum. Þá verður skipuð nefnd til þess
að endurskoða það fulltrúalýðræði sem nú er við lýði innan flokksins í
tengslum við flokksþing og kjördæmaþing. Önnur nefnd verður síðan
skipuð til þess að setja flokknum siðareglur.
Bylting unga fólksins byrjaði í Framsóknarflokknum. Ljóst er að
siðbótar er þörf í íslenskum stjórnmálum og fylgja vonandi allir
stjórnmálaflokkar í fótspor þessa síunga flokks.
Eggert Sólberg Jónsson
Varaformaður Sambands ungra framsóknarmanna
|
|
|
|
|
