14 / 03 / 2007 | Eggert Sólberg Jónsson
Miðjugrænir
Stundum heyrir maður talað mjög illa um Framsóknarflokkinn í
sambandi við umhverfismál. Flokkurinn og kjósendur hans eru uppnefndir
sem náttúruterroristar og svo fram eftir götunum. Þetta er alls ekki
sanngjarnt enda hefur flokkurinn staðið fyrir skynsamri nýtingu á
auðlindum náttúrunnar allt frá stofnun hans. Það er illa komið fyrir
umræðunni um umhverfismál séu allir þeir sem vilja nýta kosti
náttúrunnar álitnir óvinir hennar.
Sjálfbær nýting náttúrunnar er grunnstefið í umhverfisstefnu
Framsóknarflokksins. Unnið hefur verið að rammaáætlun um nýtingu
vatnsafls og jarðvarma með það að markmiði að leggja mat á og flokka
virkjunarkosti með tilliti til orkugetu, hagkvæmni og umhverfisáhrif.
Rétt er að geta þess í þessu samhengi að markmið ESB ríkjanna er að 20%
af orkuneyslu þeirra komi frá umhverfisvænum orkuverum árið 2020. Á
Íslandi er þetta hlutfall 70% í dag. Þessar tölur koma Íslendingum í
fremstu röð þjóða heimsins í umhverfismálum og var m.a. haldin
ráðstefna á vegum þriggja ráðuneyta Framsóknar í september sl. þar sem
fjallað var um sjálfbæra orkunýtingu í þróunarríkjum með áherslu á
jarðhita og vetnistækni. Þekking okkar og umhverfisstefna er
útflutningsafurð. Þrátt fyrir það veltast andstæðingar flokksins um
eins og naut í flagi þegar flokkurinn ræðir um umhverfismál.
Frumvarp um stofnun Vatnajökulsþjóðgarðs er stærsta verkefni sem
ráðist hefur verið í hér á landi á sviði náttúruverndar og þó víðar
væri leitað. Ef frumvarpið nær fram að ganga á Alþingi verður til
stærsti þjóðgarður Evrópu. Svæðið mun draga að sér mikinn fjölda
ferðamanna, innlendra sem erlendra. Áætlað er að gjaldeyristekjur
þjóðarinnar aukist um 3-4 milljarða á ári, þar af 1,5 milljarðar sem
koma fram í auknum atvinnu- og þjónustutekjum á nærsvæði garðsins.
Stórkostlegt mál sem umhverfisráðherrar Framsóknar hafa borið hitan og
þungan af.
Fleiri mál væri hægt að nefna þar sem núverandi umhverfisráðherra
hefur staðið sig með mikilli prýði. Jónína Bjartmarz hefur lýst þeirri
skoðun sinni að stækka beri friðland Þjórsárvera. Í alþjóðlegu samhengi
hafa Þjórsárver mikið verndargildi enda hefur hluti þeirra verið
friðlýstur frá 1981 og á skrá Ramsar-samþykktarinnar frá 1990. Þá hefur
ráðherra einnig lagt áherslu á loftslagsmál í víðu samhengi og lýst
yfir vilja sínum til að efla almenningssamgöngur í þéttbýli, t.d. sagt
það koma til greina að ríkið komið að einhverju leiti til móts við þau
sveitarfélög sem sjá um rekstur þeirra.
Öfgar í umhverfismálum skila engu nema hruni ríkissjóðs og þar af
leiðandi veikburða velferðarkerfi. Framsókn er eini græni valkosturinn
á miðju stjórnmálanna.
Eggert Sólberg Jónsson
|
