 |
22 / 11 / 2006 | Eggert Sólberg Jónsson
Mikilvægt að umræðan sé upplýst og án fordóma
Fræðslu- og kynningarnefnd SUF stóð fyrir fræðslufundi mánudagskvöldið 20. nóvember sl. um málefni innflytjenda sem hafa verið áberandi í þjóðfélagsumræðunni upp á síðkastið. Frummælendurnir komu úr ýmsum áttum en áttu það sameiginlegt að hafa komið að umræðu síðustu vikna. Allir lögðu þeir áherslu á innflytjendur væru ekki einsleitur hópur og að umræðan þyrfti að vera málefnaleg og án fordóma.
Sæunn Stefánsdóttir, alþingismaður og formaður Innflytjendaráðs hóf umræðuna og fór yfir hlutverk ráðsins. Benti hún á að flestir innflytjendur sem hingað kæmu væru á vinnumarkaði enda væri mikla vinnu hingað að sækja. Atvinna er lykill að velferð fólks, bætti hún við. Í dag eru hér á landi einstaklingar af 120 þjóðernum sem auðga menningu okkar. Þá má ekki gleyma þeim auð sem fólginn er í þekkingu þeirra, t.d. á sviði tungumála. Sú þekking gæti komið sér vel í útrásinni. Sæunn kom inn á tungumálakennslu og benti á að þekking á móðurmálinu væri grundvöllur þess að hægt væri að læra nýtt tungumál. Þá sagði hún að á leiðinni væri leiðarvísir á níu tungumálum sem nýttist innflytjendum fyrstu dagana á Íslandi.
Einar Skúlason, forstöðumaður Alþjóðahúss skýrði frá starfsemi hússins og þeirri þjónustu sem þar er í boði. Þar starfa í dag 17 starfsmenn í 12,5 stöðugildum. Um helmingur starfsmanna er af erlendum uppruna. Hlutverk hússins er ekki eingöngu að tengja saman innflytjendur og íslendinga heldur einnig innflytjendur innbyrðis. Einar kom inn á fréttaflutning síðustu vikna sem hann taldi óheppilegan á stundum, sér í lagi þegar þjóðerni glæpamanna er tekið fram í fréttum án þess að það komi glæpnum beint við. Þ.a.l. heldur almenningur að innflytjendur fremji hlutfallslega fleiri glæpi en Íslendingar. Samkvæmt tölum frá lögreglunni er raunin önnur. Í máli hans kom einnig fram að neikvæðni hefur aukist meðal grunnskólanema í garð samnemenda sinna af erlendum uppruna á síðustu vikum. Það er því þörf á aukinni fordómafræðslu í skólakerfinu. Að lokum skýrði hann frá því að á næstunni yrði stofnaður samráðshópur trúfélaga enda væri kjarninn í deilum um innflytjenda oft trúarbrögð.
Að lokum ræddi Baldur Kristjánsson, varaforseti ECRI, Evrópunefndar gegn kynþáttamisrétti um starf nefndarinnar. Í skýrslu frá árinu 2003 er Alþjóðahúsi og Fjölmenningarsetri hrósað og mælt með því að komið verði á fót embætti umboðsmanns innflytjenda. Þá benti hann á að Íslendingar hafa skrifað undir nokkra sáttmála sem leggja bann við mismunun en eiga enn eftir að staðfesta þá. Í stjórnarskrá Íslands er ekkert ákvæði sem bannar kynþáttamisrétti. ECRI hefur mælst til þess að ríki Evrópu setji slík ákvæði í stjórnarskrá. Í Evrópu mætir innflytjendum yfirleitt mismunun í aðgengi að húsnæði, í ákveðnum hverfum fær fólk ekki að leigja eða kaupa. Þá er fólki mismunað þegar það sækir um vinnu, eða þar sem nóg er um vinnu fær það ekki eðlilegan framgang í starfi. Erindi Baldurs má sjá í heild sinni á síðu hans: www.baldur.is undir ræður.
Að loknum framsögum gafst gestum í sal tækifæri til að segja sína skoðun og varpa fram fyrirspurnum. Nokkur umræða varð um fjárhagsstöðu Alþjóðahúss en fyrirséð er að fjárframlög Reykjavíkurborgar og Reykjavíkurdeildar Rauða kross Íslands skerðist um allt að 14 milljónir króna á næsta ári en í dag standa yfir viðræður við fleiri sveitarfélög um að koma að rekstrinum. Nokkuð var rætt um þá mynd sem dregin er upp af innflytjendum í fjölmiðlum, t.d. Spaugstofunni og á Útvarpi Sögu. Í svörum Einars kom fram að nokkrum sinnum hefur verið rætt við fjölmiðla vegna þessa en stundum nái þrá fjölmiðlamanna að semja krassandi fyrirsagnir yfirhöndinni. Vinnumarkaðsmálin voru einnig tekin til umræðu og spurt hvort hræðsla innflytjenda við atvinnurekendur væri ástæða þess að þeir fengju aðeins borguð lágmarkslaun. Í svörum frummælenda kom fram mikil ánægja með þær breytingar sem urðu 1. maí sl. en þá var atvinnuleyfið ekki lengur í höndum vinnuveitenda heldur hjá launþeganum sjálfum. Þá kom fram sú hugmynd hvort ekki væri rétt að aðeins „vottuð“ fyrirtæki þar sem ekkert misrétti væri í gangi gætu fengið verkefni hjá hinu opinbera. Það er jú þannig að allir tapa á félagslegum undirboðum á vinnumarkaði.
Málefnafundurinn vakti athygli fjölmiðla.
Hér má sjá link frá 22:00 fréttum hjá Rúv þar sem rætt er við Sæunni Stefánsdóttur og Baldur Kristjánsson. http://dagskra.ruv.is/streaming/sjonvarpid/?file="4284818/0
Hér er linkur á fréttavef rúv: http://www.ruv.is/heim/frettir/frett/store64/item98474/
Stjórn SUF Ályktaði um málefni innflytjenda í vikunni sem leið.
“Stjórn SUF telur fjölmenningarlegt samfélag á Íslandi af hinu góða. Stjórn SUF leggur áherslu á mikilvægi þess að ræða málefni innflytjenda á málefnalegum grundvelli og án öfga og sleggjudóma. Slík umræða er afar mikilvæg og nauðsynleg fyrir íslenskt samfélag og stjórnvöld til að mynda sér skoðanir og heilstæða stefnu í þessum málaflokki
Stjórn SUF telur að bjóða eigi þá útlendinga sem hér vilja lifa og starfa og eru löglega komnir til landsins velkomna í samfélagið. SUF telur það mikilvægt verkefni ríkisvaldsins að tryggja eins og framast er kostur örugga aðlögun innflytjenda að íslensku samfélagi þannig að þeir geti sem fyrst eftir komu til landsins tekið virkan þátt í samfélaginu og þannig nýtt hæfileika sína, starfskrafta og menntun til fulls.
Þar telur SUF grundvallaratriði að tryggja að innflytjendum standi til boða vönduð íslenskukennsla sem sniðin er að þörfum þeirra og skipulögð í góðu samráði við þá.
Sömuleiðis eru nauðsynlegt að efla skólakerfið þannig að tryggt verði að skólar landsins séu í stakk búnir til að sinna börnum innflytjenda jafn vel og öðrum börnum svo að ekki verði hærra brottfall úr skóla úr þeirra hópi en annarra og að börnum innflytjenda verði gert kleift að sækja sér framhaldsmenntun í jafn ríkum mæli og öðrum. Þá telur SUF mikilvægt að stuðla að því að börn innflytjenda taki einnig virkan þátt í íþrótta- og tómstundastarfi.
Að lokum telur SUF nauðsynlegt að Vinnumálastofnun séu fengin þau tæki í hendur sem nauðsynleg eru til að fylgjast með því að erlendir verkamenn séu ekki að störfum hér á landi á lægri launum eða verri starfskjörum en lög og kjarasamningar segja til um, eða í svartri vinnu. Refsa skal atvinnurekendum sem stunda slíka iðju.“
|
|
|
|
|
