Þema þingsins í ár var atvinnumál og vinnumarkaðurinn. Á föstudeginum voru þrír áhugaverðir fyrirlestrar tengdir þessum málum. Peter Palshøj fjallaði um það sem er ólíkt með vinnumarkaði Norðurlandanna. Niels Paarup-Petersen talaði um samstarf Svía og Dana á Eyrarsundssvæðinu, árangur sem náðst hefur með samstarfi og þau vandamál sem upp hafa komið. Að lokum fjallaði Ludde Enggren um norrænu rannsóknarstofnunina NordForsk. Þing fulltrúar fengu síðan tækifæri til að ræða saman í smærri hópum um vinnumarkaðinn og hvert skuli stefna.

Á laugardag hófst þingið fyrir alvöru. Þá voru til umræðu ályktanir sem lagðar voru fyrir þingið. Við afgreiðslu þeirra á sunnudag fengu íslendingar í gegn ályktun sem fól í sér stuðning við sjálfbærar hvalveiðar. Mikill meirihluti þingfulltrúa greiddi atkvæði með ályktuninni. Árangur norrænna miðjumanna var nokkuð góður á þinginu. Af sex ályktunum sem norrænir miðjumenn, NCF (Nordiska Centerungdomens Förbund) lögðu fram voru fjórar samþykktar. Þær snéru að réttindum samkynhneigðra til blóð-, sæðis- og eggjagjafa, öfluga fjarskiptaþjónustu til allra á Norðurlöndunum, sameiginlegt líffæragjafarsvæði og byggðamál.

Þá var Tytti Seppänen frá finnska Miðjuflokknum kjörin forseti Norðurlandaráðs æskunnar næsta árið. Alexander Fosse Anderson frá norska Miðjuflokknum verður fulltrúi NCF í forsætisnefnd ráðsins næsta árið og Minne Lindberg hans varamaður. Tytti hefur verið virk í norrænu samstarfi í sex ár, á sæti í borgarstjórn Åbo og stefnir að þingframboði í finnsku kosningunum í vor.

Mjög hart er sótt að norrænu samstarfi í dag og eru margir sem segja samstarfið innan Norðurlandaráðs vera tímaskekkju. Þrátt fyrir ólíkan bakgrunn hugsa íbúar svæðisins svipað. Fundir eins og þing Norðurlandaráðs æskunnar gefa ungum stjórnmálamönnum tækifæri til að hittast og ræða saman um lausnir á sameiginlegum vandamálum og miðla því sem vel hefur verið gert annars staðar eða þá misheppnast. Á næstunni þarf t.d. að halda áfram að vinna að afnámi landamærahindrana, auknu samstarfi í öryggismálum, efla baráttuna gegn mansali og auka samstarf sem snýr að rannsóknum, menntun og umhverfismálum svo eitthvað sé nefnt. Samstarf Norðurlandanna hefur aldrei verið mikilvægara en í dag og er nauðsynlegt að gera það enn meira áberandi. Norrænt samstarf á fullt erindi inn í framtíðina.

Eggert Sólberg Jónsson