Það er oft sagt að ungt fólk hafi ekki áhuga á stjórnmálum. Ég tel að það sé ekki rétt, áhuginn er til staðar, en hann er hins vegar af öðru tagi en hjá eldra fólki. Þegar maður er ungur hefur maður efni á því að stjórnast af hugsjónum einum. Árin fyrir húsnæðislán, helgarvinnu og bleyjuskipti eru tíminn þar sem ungt fólk finnur hvers konar stjórnmál höfða til hugsjóna þeirra, hvaða grunnstefna á best við þau. Það er á þessum tíma sem stjórnmálahreyfingar hafa tækifæri á að kynna fyrir ungu fólki hver grunngildi þeirra eru, hvernig aðferða- og hugmyndafræði þær standa fyrir. Ég held að það sé best að vera hreinskilinn og viðurkenna að á undanförnum árum höfum við framsóknarmenn orðið undir í þessum ímyndarslag.
Aðrir flokkar á Íslandi hafa náð að kynna sig mun betur fyrir ungu fólki. Hægristefna, einstaklingsfrelsi, jafnaðarstefna og umhverfis-talíbanastefna VG eru vel innpakkaðar stefnur sem markvisst eru kynntar fyrir ungu fólki. Ég tel að möguleikar okkar framsóknarmanna felist einmitt í okkar grunnstefnu, þeirri aðferðafræði og stjórnmálum sem við eigum að standa fyrir. Í grundvallarstefnuskrá okkar stendur: „Framsóknarflokkurinn er frjálslyndur félagshyggjuflokkur sem vinnur að stöðugum umbótum á samfélaginu og lausn sameiginlegra viðfangsefna þjóðfélagsins á grunni samvinnu og jafnaðar. Hann stendur vörð um stjórnarfarslegt, efnahagslegt og menningarlegt sjálfstæði Íslendinga, byggt á lýðræði, þingræði og réttaröryggi. Framsóknarstefnan setur manninn og velferð hans í öndvegi“. Þessi orð þykja mér vera sérlega fögur og vel til þess fallin að vera leiðarljós fyrir stjórnmálaflokk.
Mynd: RobW/Flickr
Það fallegasta í stefnuskrá okkar þykir mér vera að við eigum alltaf að stefna að „stöðugum umbótum á samfélaginu“, við eigum aldrei að sætta okkur við óbreytt ástand ef að möguleiki er á að gera betur. Gott dæmi um þetta þykir mér vera auðlindamál. Hér á Íslandi höfum við gríðarstór og gjöful jarðvarmasvæði og nýtanleg svæði verða stærri og öflugri með hverju árinu, eftir því sem nýtingartæknin þýtur áfram. Ný tækni og fræði í jarðvarmaverkfræði eru að gjörbylta öllu sem við hingað til höfum „vitað“ um nýtingu á þessari auðlind. Nú í dag er hægt að nýta svæði sem áður voru talin innihalda ekki nokkurn jarðvarma. Framsóknarflokkurinn getur verið, og á að vera sá flokkur sem grípur þessar framfarir – þessa byltingu – á lofti og leyfir henni að lita okkar stefnu í þessum málum. Þrátt fyrir góða sögu Framsóknarflokksins í jarðvarmamálum er stefnumótun okkar 10 árum á eftir nútímanum, sem er þó mun betra en hjá hinum stjórnmálaflokkunum, t.d heldur VG fast í viðhorf gagnvart jarðvarmanýtingu sem að ómenntaður 19. aldar íhaldsmaður væri stoltur af. Ég tel að á næsta flokksþingi eigum við ungir framsóknarmenn að pressa á nútímastefnu í orku, auðlinda- og umhverfismálum. Við eigum að halda okkar stefnu á lofti og vera alls óhrædd við að leggja fram til samþykktar umbótastefnu í þessum málum sem og öðrum.
Fyrir mér þýðir miðjustefna að maður nálgast öll vandamál án þess að vera litaður af fyrirfram ákveðnum gervihugsjónum. Hvert verkefni er sérstakt og verður að leysa með tilliti til þess. Ef verið er að ákveða hvar á að virkja, er það verkefni sem þarf að nálgast út frá pólitískri hugmyndafræði? Skiptir máli hvort vinstri- eða hægrimenn eru við stjórn þegar reka á leikskóla? Þurfum við að hlusta á sjálfstæðismenn tala um frelsi þegar rökræður eiga sér stað um hvernig á að útvega námsönnum vinnu í sumar? Það hlýtur að vera mun skynsamara að koma til leiks með hendurnar óbundnar og finna bestu lausnina í hvert skipti.
Til að mynda mun félagi Steingrímur J. Sigfússon einhvern tíma hafa sagt að við þyrftum að hægja á okkur í nýtingu á jarðvarma, annars myndum við klára orkuna. Þau öfga-umhverfistrúarbrögð sem VG stundar valda því þarna að íslenskur ráðherra verður sér til skammar með fáfræði og kjánaskap. Jarðvarmatæknin er á gríðarlegu flugi og hver maður sem þekkir til veit að þetta er svipað og að halda því fram að við hefðum þurft að stoppa eldgosið í Eyjafjallajökli, áður en gosefnið inn í jörðinni myndi klárast.. sem er reyndar eflaust hugmynd sem var hent fram á ríkisstjórnarfundum.
Við framsóknarmenn þurfum að ganga óbundin að hverju vandamáli, fá sérfræðinga með og taka skynsamar ákvarðanir. Það er oft sagt að ungliðahreyfingar eigi að vera róttækar. Ég er sammála því og mun berjast fyrir því að SUF verði það áfram, róttæk í því að vera eina ungliðahreyfingin sem er skynsamari en stjórnmálaflokkurinn. Jón Gnarr sagði það best þegar að Sóley Tómasdóttir krafði hann um hugsjónir í leikskólamálum : „Opna þeir ekki bara áfram á mánudaginn eins og venjulega?“.